Werkstatt
   der Sinne

Ds Gaschtgwärb isch uf Handwärch ufbout. Sigs ir Chuchi, wo aui Prodkt i Handarbeit veredlet wärde oder im Service, wo äbefaus es Handwärch usgfüert wird. Bi üs wärde aui Sinne agregt.

Rössli Säriswil - Rössli Icon

Mit de Ouge, der Nase, mitem Muu wie o mit mängem angere Organ söue öier Sinne agsproche wärde und es blibends, positivs Biud vo üsem Wirtshuus hingerlah.

D’ Traditon u ds Moderne verbinge. Eifach gmüetlech u eifach gedige. Chömit verbi u löt nech vo üsere langjährige Erfahrig u em neue Wind verwöhne u überzüget öich säuber vo üsere Art.

Sigs füre chli Hunger, es eifach guets Mittagstäuer oder es umfänglechs, mehrgängigs Gniesser-Menü.

Mir fröie üs uf Di Bsuech!

Fritz & Marina Kaufmann-Wanner
mitem Rössli-Team

Ds Wirtepaar

Generatione-Wächsu im Rössli Säriswiu.

Sit am 1. Jänner 2018 füehre mir (Fritz & Marina Kaufmann- Wanner) ir 5. Generation ds traditionelle Wirtshuus.

Aus zwöi Landeier si mir mit der hiesige Landwirtschaft verbunge. D’ Marina aus Buuretochter, glehrti Drogisti EFZ u dipl. Bruefsmasseurin u dr Fritz aus Wirtesohn, glehrte Landmaschinemech u schlussändlech eidg. dipl. Hôtelier & Restaurateur HF si mir besträbt di lokale Produkt z’entdecke u z’veredle. Sigs i de Überhose oder Gschalet, mir heisse aui Gescht härzlech Wiukomme. Bi üs brucht mä ke Schweueangscht ds ha. Mir weis eifach und persöndlech u das mit Stiu.

Ds Wirtepaar
Fritz & Marina Kaufmann-Wanner
Generatione

Sit afangs 2018 galoppiert ds «Rössli» unger dr Füehrig vor 5te Generation.

Ds traditionelle Wirtshuus wird syt mitlerwile 130 Jahr vomene Fritz gfüehrt. Agfange hets 1887 mitem Friedrich Kaufmann vo Herzogenbuchsee. Är isch aus Stoffhändler uf Säriswil cho u het ds damalige Stöckli kouft. Churz druf het er ä Dorf-Lade, d Buurerei und ä chlyni Gaschtstube ufta. Di 2ti u 3ti Genereation het gliich oder ähnlech witergfahre mit dene drüne Gwärb. Dr viert Fritz het sini Elisabeth gfunge (d Eutere u Schwiegereutere vo üs) u 1984 ghürate. Sider denn hei sie ds «Rössli» erfougrich gleitet. Ds Restaurant isch imene gediegene Rahme präsentiert u gläbt worde.

Mitlerwile isch die 5ti Generation a de Zügu vom «Rössli». Ig, der füft Fritz bi aus glehrte Landmaschinemechaniker ächlei us der Reihe tanzt. Ha aber scho immer gwüsst, dass i einisch id Fuessstapfe vo mine Euter wet trätte. Sit 2011 bini im Gaschtgwärb ungerwägs. 2014 hani erfougrich d Belvoirpark Hotelfachschueu abgschlosse u witeri Erfahrige im Hotel Schiff am See ds Murte gsammlet. Site em 7.7.2017 isch o di 5ti Generation Kaufmann komplett. Mitlerwile Fritz & Marina Kaufmann-Wanner. Ä glerti Drogischti us Etzelkofen isch i üsi Familie cho.

Für Tradition ir nöie Generation wird gsorget: Dr 6ti Fritz, üse Sohn dr Fritz Theo, nach sine Grossvätere benennt u d Elisa Christina, nach de Grossmüettere benennt mache üsi Familie komplett.

Zäme mit em ganze «Rössli-Team» galoppiere mir mit Elan u vouer Motivation id Zuekunft .

Rössli Familiä

Üse Miguel isch mit 26gi vo Madeira i d Schwiz zoge u schaffet scho bau syt 25 Jahr liideschaftlech aus Chäuner bi üs im Rössli.

I sire Freizyt betribt är viu Sport. Är rennt Marathon, spiut gärn Tennis u turnet ou wüchendlech mit sine Turnerkollege. Sini Liideschaft ischs, üsi Gescht z verwöhne und ihne es unvergässlechs Erläbnis z bereite. Dr Miguel isch stouze Ehema u Vater vo drei wundervolle Töchtere.

Üse Päddu, isch nid nur uf däm Biud im Hingergrund sondern ou aus Chuchischeff.

Är isch dr kreativ Chopf bi üs ir RössliChuchi.
Aus Perfektionischt u liideschaftläche Choch luegt är, dass hinger de Kulisse aues rund louft. Är isch beschträbt, dass üser huusgmachte Gricht i beschter Qualität – schön agrichtet ufe Täuer chöme.
Syt 6 Jahr ghört är zur RössliFamiliä. I sire Freizyt kümmeret är sich um sis Aquarium im Rössli, fahrt gärn Rennvelo u jogget zwüschdüre mitem Miguel übere Friener.

SummerFeriä