Pintli
Träffe u kennelehre. Ds Pintli aus Ursprung vo üsem mitlerwile 130 jährige Wirtshuus ladt di y für öpis z trinke oder öpis chlyses z ässe.
Stübli
Agränzend ads Pintli, steit dr zwöit Teu vom Ursprungs Wirtshuus. Im Stübli si ou di Tabakgniessende wiukomme um sech es Zigarettli oder es Stümpli z gönne u derzue öppis z ässe.
Wintergarte
Vergässit dr Autag u löht üs Öii Sinne la verwöhne. Dr Wintergarte, z Terasserestaurant vor bsungrige Art empfaht Öich am Abe mitem einzigartige Stärnehimmu mit sine 420 Swarovskikristalle. Bi schönem Wätter grüesst di grandiosi Ussicht uf di imposante Bärner- und Friburger- Aupe u bi Rägewätter chame am Schärme sogar de Tröpfli zuelose wi si ufs Dach brassle. E Tisch im Wintergarte laht Öii Yladig zumene unvergässleche Erläbnis wärde.
Rössli Stube
Wo z Traditionelle zum Modern – Traditionelle übergeit. Di heimmeligi Stube mitem Usblick i offnig Wintergarte. Füehlet Öich yglade, amene einzelne Tischli oder i Begleitig vo 20 Familieaghörige u Fründe es Fescht zfyre.
Rustikaler Saal
Dr schön rustikau Saal, d’ Stäge ufe u links, isch wi gschaffe für unvergässlechi Familiefescht und stiuvoui Firmealäss.
Kuriosum
Im erschte Stock verbi geits i Estrig, i üses «Kuriosum» wo vorem Ässe nones gmüätlechs Apéro cha gnosse wärde. Reisit id Vergangeheit vom Rössli. Bestuunit d‘ Antiquitäte vo Grossmuetters Lade u Grossvaters Burerei.
La Ferme
La Ferme – isch üsi auti Höibühni, dr Festsaal mitem bsungrige Ambiente. Eimalig i syre Art, originell-rustikau und doch stiuviou-gedige. Di ideali Umgäbig für bsungrigi Momänte z‘ fyre.
Gärtli
Eini vo de schönschte Terrasse, mit wunderschönem Usblick uf d‘ Bärner Aupechetti. Dr Ort für’s Namittagsgaffee oder Fürobebierli bis zum feine Ässe unger freiem Himmu.
Wy-Chäuer
Zumene guete Ässe, ghört e gueti Fläsche Wy. Vo hiesige Spezialitäte bis zu guete Tropfe vo Übersee, hets sicher öbis Passends. Üser, öppe 120 Wy-Sortene, si im gwöubte Chäuer guet glageret u dörfe ou bimene Apéro vor Ort besichtiget wärde.
Spiu-Zimmer
Was gits nid entspannters aus zfridni Ching im Restaurant? Syt mir säuber e Rassubande hei, wüsse mir was das heisst. I üsem Spiuzimmer, im 1. Stock chöi sech üser Chlyne-Gescht mitem Chrämerli-Lade oder eme Büechli verdörle. Ä Wickutisch mit Utensilie u verschideni Sitzli erliechteret d Chinderhautig.
Rössli-Zoo
Wes zwüschedüre a di früschi Luft söu ga, hets im Garte e Spiuplatz mit Rutschbahn, Rittigampfi u dernäbe es Gheg mit Geisse, Söili u Hase.
