THE HUMAN JUKEBOX im Rössli

Hesch schomau e mönschlechi "Jukebox" gseh?
Gly isches sowit u du hesch d'Müglechkeit, dr Gwinner 2023 vor SRF-Show «Stadt Land Talent» Michael Wäckerlin – ou bekannt aus «The Human Jukebox» – live bi üs im Rössli z'erläbe. In dr SRF-Show «Stadt Land Talent» verzoubert dr Michael Wäckerlin nid nume d'Jury, sondern eroberet d'Härze vor gsamte Nation im Sturm.
Ds Publikum bestimmt dr Musigverlouf vom Abe anhand ere Playlist vo über
240 Title. Ds Playback tönt us de Verstercher, di „lebändigi Jukebox“ singt live derzue. I "The Human Jukebox" steckt dr Michael Wäckerlin. Är isch e Tenor mit italiänische Wurzle, ir Schwiz gebore, jedoch i Süd- u Mittuamerika ufgwachse. Syt sire Chindheit het är e töifi Bindig zur Musig. Nach jahrelange Stimmusbiudige ar Jazzschuel und a dr Mailänder Scala gits chuum e musikalischi Genre, vo dr Michael nid beherrscht: Vo Heavymetal über Schlager bis zur klassische Oper, Operette und Musical, singt är so gut wi aues – und steut das bi sine Uftritte ydrucksvou unger Bewys.